Ye lo pichle hafte ki apni pagaar….poore paanch sau
rupaye…..
Shukar hai aaj pagaar mil gayi….ghar mein sab raashan khatam
hai….aur guddi ke liye naye kapde bhi lungi is baar….pichle che mahine se vahi
ek frock dho-dho ke pehen rahi hai….
Bhai sahib….ye parche ke hisaab se raashan ka saamaan dena
toh zara…
Lo ye paisa…
Yeh kya behen….paanch sau ka note nahin chalega…
Par 333 rupaye hi to bane hain kul milake…
Haan behen…par Sarkar ne paanch sau ka note band kar diya
hai…
Kya bakwaas kar rahe ho bhai? Kal hi seth ne diya mujhe….
Diya hoga….kal raat 12 baje se hi band kiya hai Sarkar ne….
Samajh nahin aaya bhai….ab raashan kaise milega?
Jaake ye 500 rupaye ke note ki jagah sau-sau rupaye ke note
lao…
Kahan se laun?..tum hi de do bhaiyya…
Main kahan se dun behen? Main toh khud pareshan hun…..
To main kya karun ab bhaiyya?
Tum aisa karo bank jaake note badalwa lo…..
Kya keh rahe ho bhaiyya?.....Main aaj tak bank nahin gayi….
Toh apne seth se baat karo behen…..
Theek hai bhaiyya….baat karke dekhti hun…..
(Agle din….seth ke paas)
Sethji….ye paanch sau ka note koi le nahin raha…mujhe
sau-sau ke note de do…
Kahan se laaun main sau-sau ke note? Apna kaam kar jaake
Par seth ji ghar mein raashan bhi nahin hai…Guddi ko kya
khilaun?
Vo sab mujhe nahin pata…jaa apna kaam kar….
(Shaam ko dukaandaar ke paas)
Bhaiyya seth toh meri baat nahin sun raha….main kya karun
ab?....
Meri maan behen…kal bank chali ja…
Par bhai 5 km door hai bank….main kabhi nahin gayi….aur phir
poore din ki pagaar jaayegi….
Aur kya chaara hai tere paas behen?
Theek hai bhaiyya….kal jaake dekhti hun….
(Agle din 2 ghante chalke bank pahunchne ke baad)
Arre kahan andar jaa rahi ho behen….dekh nahin rahi itni
lambi kataar hai? Peeche jaake khadi ho jaao….
(Ek ghanta kataar mein khade rehne ke baad bank ka karamchari
bahar aata hai)
Apne apne ghar jaao….paisa khatam ho gaya hai….
(Sab log kuch der jhagda karte hain….phir jhalla kar jaane
lagte hain…Jyoti bank ke karamchari ke paas jaati hai)
Sahab….mere paas ek hi paanch sau ka note hai….sau-sau ke
note de do….do din se raashan khatam hai….Guddi ko kuch khila nahin paayi hun….
Arre main kya kar sakta hun behen….sab note khatam ho gaye
hain…..badi mushkil se kuch note aaj pahunche the…..vo bhi khatam ho gaye….
Par saahab main kya karun?
Kal aana behen….
(Vo mayoos hokar do ghante ka raasta tai karke phir ghar
pahunchti hai….Guddi bhookh ke maare ro rahi hai….vo pados se kisi tarah ek
roti ka intezaam karti hai ayr Guddi ko khila kar sula deti hai…par use neend
nahin aati….is soch mein ki kal bank mein kya hoga)
(Agle din subah jaldi uthkar vo phir bank pahunchti
hai….utni hi lambi kataar mein lag jaati hai)
Bank karamchari thodi der mein pahunchta hai….
Bhai apne apne ghar jao….aaj paisa nahin aaya hai….
Nahin aaya?...Par kal to aapne kaha tha sahib aaj aane ke
liye….
Kaha tha…..par main kya karun?...Paisa nahin pahuncha….kal
aana….
(Vo phir ruaansa sa munh leke vaapis ka raasta the karna
shuru kar deti hai….raaste mein ek ghar ke andar use Pradhan mantra TV par
dikhte hain toh vo sunne ke liye khadi ho jaati hai)
Pradhan Mantri: Bhaiyon aur behenon….mujhe garv hai apne
deshvaasiyon pe jo desh ke liye lambi kataaron mein khade hone se nahin ghabra
rahe….kaale dhan ke khaatme ki is ladayi ke liye app sab ne hi mujhe shaasan ki
baagdor saunpi thi…..bhaiyon aur behenon….main aapse keval 50 dinon ki mauhalat
maang raha hoon…..mujhe yakeen hai ki is desh seva se aap peeche nahin
hatenge…..
Ye sunkar use kuch zyaada samajh toh nahin aata….kataar mein
khade hone se vo kaise desh seva kar rahi hai?....ye kaala dhan kya hota
hai?...usne aaj tak kabhi bhi kale rang ka koi note nahin dekha tha…..is soch
mein doobe hue use yaad aata hai kichunaav ke samay vo kis tarah vote dene gayi
thi…us samay jo ab Pradhan mantra hain unki baatein use badi bhaayi thi….gaaon
mein bhi sabhi ne yehi kaha tha ki ab achche din aayenge….
Khair ye sochte sochte vo ghar pahunchi to Guddi phir bhookh
se behaal mili…..Jyoti ki samajh mein nahin aa raha tha ki vo kya kare….pados
mein rukmini ke paas gayi toh pata chala ki vo bhi khaana nahin paka saki thi….
Ghar aake kisi tarah paani pilakar Guddi ko sula diya….soch
rahi thi ki do din se kaam pe bhi nahin jaa saki hai….do din ki pagaar to vaise
hi barbaad ho chuki thi….ek paisa nahin tha uske haath mein…kya kar sakti
thi…kal phir bank jaana hi panda tha….khud bhi bhookhi pyaasi vo behaal ho
chuki thi par koi aur raasta dikhai bhi toh nahin padta tha….par vo abhi bhi
yeh nahin samajh paa rahi thi ki vo kis tarah ek sachi deshpremi hona saabit
kar rahi thi? Kaala dhan kaisa dikhta tha?.....uske kataar mein khade hone se
kale dhan ka aur deshseva ka kya lena dena tha?.....aur kya ye achche din the
jo vo samajh nahin paa rahi thi?....ye sab sochte sochte uski aankh lag gayi…
Agle din phir jaldi uthke Guddi ko sota chod baahar se
darwaaza band kar aur rukmini ko Guddi ka dhyaan rakhne ke liye bolkar vo bank
ke liye nikal padi….
Vahan jaakar phir vahi nazaara dekhne ko mila….aaj teesra
din tha….log kataar mein khade the…thodi der baad bank khula toh dheere dheere
kar uska number aaya…vo bank saahab tak pahunchi aur apna paanch sau ka note de
diya….saahab ne kaha apna aadhaar card ya raashan card kuch dikhao….
Vo toh kuch laayi nahin thi….use kya maaloom?,,,kisi ne toh
aisa nahin bataya tha….vo saahab se gidgidayi ki vo use aaja paise de den to vo
agle din raashan card laake dikha degi….
Par saahab tas se mas na huye…bole main kuch nahin kar
sakta…sarkaar ka order hai…..
Roti bilakhti pareshan vo paanch sau ka note muththi mein
band kar ghar ki taraf chal padi….
Ghar pahunchi toh rukmini guddi ke sar pe thande paani ki
pattiyaan kar rahi thi….Guddi ko bahut tez bukhaar tha…..Ghabrayi si Jyoti ne
Guddi ko uthaya aur paas vale dawakhane ki taraf daud padi….Vahan doctor
memsaahab ne Guddi ko dekha to bola ki use bade aspataal mein bharti karaana
hoga….shayad koi machchar se kaatne vaali beemaari ho gayi thi Guddi ko…..
Jyoti ghabra gayi…bada aspatal to 10 meel door tha…kaise
leke jaaye Guddi ko?...Paise bhi to nahin the uske paas….Doctor memsaahab ne
bhi haath khade kar diye the…khud bhi veh is kaale rang ke note ki vajah se
pareshaan thi….
Kisi tarah Guddi ko god mein uthakar vo rikshaw vale Jugnu
bhaiyya ke paas pahunchi…sab baat batayi to vo Guddi ko rickshaw mein le jaane
ko tayyar ho gaya….Rikshaw mein ek ghanta lag gaya safar the karne mein…Guddi
bilkul behosh thi….
Ek ghante baad aspataal pahunche toh vahaan bhi lambi
kataaarein thi har jagah….kisi tarah ek doctor memsaahab se baat karne ko mili
to usne sab kissa sunaya…. Doctor memsaahab ne use rukne ko kaha aur bola ki
main bade saahab se baat karke aati hun….isi mein do ghante aur beet gaye…
Achanak use vahi doctor memsaahab dikhi….bhagkar unke paas
gayi aur poocha to unhone kaha Guddi ko laao main dekhti hun….
Guddi ko jaanchne ke baad vo doctor memsaahab boli ki Guddi
ko kisi cheez ki zarrorat hai jo aspatal mein nahin hai…kya cheez thi use
samajh mein nahin aaya tha….Doctorniji ne bola tha ki ya to vo baahar se
intezaam kar ke laaye yak al subah tak ka intezaar kare….
Baahar 2 meel door ek dawakhana tha….vo bhaagkar vahan
pahunchi toh vo bhai bola ki 500 ke note ke badle vo veh cheez nahin de
sakta….Jyoti kahin se sau sau ke note laaye….Usne bahut madad maangi par kahin
se intezaam na kar paayi….
Thak haar kar behaal vo chaar ghante baad aspataal
pahunchi….Guddi ke paas gayi aur uske sar pe pyaar se haath phera….Guddi ko
choote hi vo sannate mein aa gayi….do
minute baad hosh aaya toh bhaagi doctorni ko bulaane….
….Bejaan Guddi ko baahon mein bhar ke vo ghar ki taraf chal
padi…..khud bhi ek zinda laash ki tarah…..ghar pahunch ke Guddi ko bistar par
leta diya usne…..chulhe ke paas padi hui maachis uthayi aur paanch sau rupaye
ke note ko jala daala…..phir apni ek saadi uthayi aur upar lage pankhe ke saath
latak gayi……
No comments:
Post a Comment